Vide que vos convido / a vos ver (Xela Arias)
Tomando prestados os versos da admirada Xela Arias, convídovos a incendiarvos á calor da observación desta galería de espellos. Se vos asomades a estes videopoemas descubriredes reflexos de vós, doutras identidades e outros corpos. Veredes pegadas, sucos, pel e memoria. Veredes sensibilidades diversas á hora de entretecer palabra, son e imaxe, ese espectáculo de non ser para ser de todo. Asistiredes a un diálogo entre as luminosas pezas de DSK, Fiinda, As Candongas do Quirombo, Yolanda Castaño, Adriana Páramo, Jesús Castro e Cintaadhesiva. Oxalá o seu talento vos prenda a emoción por ver que máis atopades a través do espello.
Celia Parra
Foto: Alba G Gallego
Celia Parra é poeta e dedícase á produción audiovisual. Autora de Pantallas (Ed. Galaxia, 2018) e No berce das mareas (Ed. Fervenza, 2009), forma parte de diversas antoloxías e os seus poemas foron traducidos a varias linguas. Especialízase en videopoesía, acadando coas súas pezas numerosas seleccións e galardóns en festivais internacionais. Foi creadora da idea orixinal e produtora executiva de Versogramas (dirixido por Belén Montero e Juan Lesta, 2018), considerado o primeiro documental arredor do panorama internacional da videopoesía.
Exposición pechada.